شعر و ادب

نانونامہ ای نظم

شاعرسیدنذیرحسین شاہ نذیر

تومہ آرزوان داستان مہ شیرین نان تومہ دردوتے درمان مہ شیرین نان

تومہ یاقوت مرجان مہ شیرین نان تو مہ آباد گلستان مہ شیرین نان

تو مہ آباد گلستان مہ شیرین نان

دردوطیب ای افلاتون تو اسوس مہ زندگی مہ ہرجنو نون تو اسوس

ژانو سارخوش حتارافزون تو اسوس تومہ خیالو جہان مہ شیرین نان

تو مہ آباد گلستان مہ شیرین نان

تو تان اورارو پالے مہ پویتاؤ کیڑیکو کوخشکی کی دیتی مہ کاسیتاؤ

ہر ای سختیو خشی مہ باردیتاؤ تومہ ووریو ختان مہ شیرین نان

تو مہ آباد گلستان مہ شیرین نان

غیچھاری بروا بیکوبوس ہردی پھت کیچہ خلوصاری ٹیپ تہ محبت

اسوم خوشان یہ تہ دُعاو براکت تو مہ ہردیو آرمان مہ شیرین

تو مہ آباد گلستان مہ شیرین نان

نانو سکو نو تو سار آوریتام کیاوت بیتڑی چوکی کی کوسیتام

نیشکو لشٹہ شوقہیاو کیڑیتام تو مہ اندازِ بیان مہ شیرین نان

تو مہ آباد گلستان مہ شیرین نان

کیہ کیہ منزلین کوسی کیاغ پوشیتاؤ قرقانو چھوئے نو پوری مہ گانیتاؤ

میتے پسہتی دی کوری مہ بیٹریتاؤ تو مہ حیاتو پہچان مہ شیرین نان

تو مہ آباد گلستان مہ شیرین نان

نکی مطلبو لالچ تہ الفتہ لوو نیکیو تو دوس صداقتہ

ژانو قربان دی کوروس ہرساعتہ تو مہ گلشانوبا غبان مہ شیرین نان

تو مہ آباد گلستان مہ شیرین نان

تو تان مستیو ہر لمحو روخسیتاو نیشے تان شیکہ مہ سومئیے بہچیتاو

نہ ای سکونہ تو شاپیک لوسیتاو تو مہ گفتار زبان مہ شیرین

تو مہ آباد گلستان مہ شیرین نان

قبول نذیرو ؔ کوروئے ہر عارضیو تہ سف ارمانن سوم واخوشانیو

مشکیم اللہ و سار تہ زندگیو تومہ جنتو کیشمان مہ شیرین نان

تو مہ آباد گلستان مہ شیرین نان

Print Friendly, PDF & Email

آپ کی رائے

comments

پامیر ٹائمز

پامیر ٹائمز گلگت بلتستان، کوہستان اور چترال سمیت قرب وجوار کے پہاڑی علاقوں سے متعلق ایک معروف اور مختلف زبانوں میں شائع ہونے والی اولین ویب پورٹل ہے۔ پامیر ٹائمز نوجوانوں کی ایک غیر سیاسی، غیر منافع بخش اور آزاد کاوش ہے۔

متعلقہ

Back to top button