گلگت بلتستان تنازعہ کشمیر کا اہم جز ہے، مسئلہ کشمیر کو متاثر کئے بغیر عوام کو حق حکمرانی ملنی چاہئے ۔ امیرجماعت اسلامی گلگت بلتستان

چلاس ( چیف رپورٹر ) جماعت اسلامی گلگت بلتستان کے امیر مولانا عبدالسمیع نے کہا ہے کہ موجودہ حکومت گلگت بلتستان کو کچھ دینے کی پوزیشن میں نہیں ہے ۔ گلگت بلتستان تنازعہ کشمیر کا اہم جز ہے ۔ مسئلہ کشمیر کو متاثر کئے بغیر عوام کو حق حکمرانی ملنی چاہئے ۔ دیامر پریس کلب میں میڈیا سے بات چیت کرتے ہوئے انہوں نے کہا کہ صوبائی حکومت شیڈول فور اور نیشنل ایکشن پلان کو متنازعہ بنا رہی ہے ۔ اپوزیشن کا کردار ادا کرنے والوں پر شیڈول فور اور نیشنل ایکشن پلان لگانا باعث تشویش ہے ۔ انہوں نے کہا کہ دیامر بھاشا ڈیم کی سو فیصد رائلٹی گلگت بلتستان کو ملنی چاہئے ۔ گلگت بلتستان سی پیک کا گیٹ وے ہے ۔ ہمارا مطالبہ ہے کہ گلگت بلتستان میں تین اکنامک زون بننے چاہئے ۔ ہنزہ ، گلگت اور دیامر میں ایک ایک زون بنایا جائے ۔ انہوں نے کہا کہ حدود تنازعہ سمیت لوکل نان لوکل اور تھک داس ایشو کا جرگے کے ذریعے حل نکالا جائے ۔ ایک سوال کے جواب میں انہوں نے کہا کہ مقبوضہ کشمیر کے عوام تکمیل پاکستان اور نظریہ پاکستان کی جنگ لڑ رہے ہیں ۔ عالمی برادری مسئلہ کشمیر کو کشمیریوں کی خواہشات کے مطابق حل کرے ۔