چترال (نذیرحسین شاہ نذیر) کریم آباد اور آرکاری ویلی کے لوگوں نے حکومت کو دس دن کی ڈیڈ لائن دیتے ہوئے خبردار کیا ہے ۔ کہ شغور پل ، کریم آباد و آرکاری روڈ کی تعمیر اور پی ٹی سی ایل و وائر لیس لوپ کی بحالی اور شغور آرکاری پی ٹی سی ایل ٹاور کی تنصیب کا مسئلہ حل نہ کیا گیا ۔ تو علاقے کے عوام سنگین اقدامات اٹھانے پر مجبور ہوں گے ۔ جمعرات کے روز کریم آباد اور آرکاری سے بڑی تعداد میں لوگوں نے تیس سے پینتا لیس کلومیٹر پیدل مارچ کیا ۔ اور شغور کے مقام پر چترال گرم چشمہ روڈ کو ڈھائی گھنٹے تک بلاک کئے رکھا ۔ اور احتجاجی جلسہ منعقد کیا ۔ جس سے خطاب کرتے ہوئے چیرمین کریم آباد ڈویلپمنٹ آرگنائزیشن( کاڈو) اسرارالدین ، سابق ضلع نائب ناظم سلطان شاہ،جلال الدین ، سید جماعت شاہ، محمد یعقوب خان وغیرہ نے کہا ۔ کہ آرکاری ، کریم آباد اور شغور کے لوگ حکومتی بے حسی کا شکار ہو چکے ہیں ۔ چلنے کیلئے روڈ اور پل نہیں ، رابطے کیلئے ٹیلیفون اور وائرلیس لوپ کی سہولت نہیں ۔جبکہ کھانے کیلئے عوام کو ناقص گندم فراہم کیا جا رہا ہے ۔ اور حکومت لوگوں کی خاموشی کو ان کی کمزوری اور ناسمجھی گردان کر مسائل کے حل کی طرف کو ئی توجہ نہیں دے رہی ۔ لیکن حکومت کو یہ جان لینا چاہیے ۔ کہ یہاں کے لوگ کمزور اور نا سمجھ نہیں ۔ بلکہ ملکی امن کی خاطر وہ حکومت کے تمام مظالم برداشت کرتے رہے ہیں ۔ اب برداشت ان کے بس سے باہر ہو چکا ہے ۔انہوں نے کہا ۔ کہ وہ حکومت کی بجائے این جی اوز کے رحم وکرم پر زندگی گزار رہے ہیں ۔ اور اپنی مدد آپ کے تحت روڈز سے لے کر بجلی گھر ، واٹر سپلائی اور سکول تک خود تعمیر کر چکے ہیں ۔ لیکن بار بار مطالبے کے باوجود حکومت کی طرف شغور پل اور پی ٹی سی ایل کی بحالی تک نہیں ہو رہی ۔ انہوں نے کہا ۔ شغور پل انتہائی شکستہ ہو چکا ہے ۔ اور خدا نخواستہ کسی جانی نقصان کی صورت میں اس کے ذمہ دار ایم این اے ، ایم پی اے اور محکمہ سی اینڈ ڈبلیو ہو گا ۔ مقررین نے ممبران اسمبلی اورضلعی انتظامیہ پر شدید تنقید کی ۔ اور ان کے خلاف مردہ باد کے نعرے لگائے ۔انہوں نے کہا ۔ کہ لوگوں نے لاکھوں روپے کے وائر لیس لوپ سیٹ خریدے ۔ اب اگر پی ٹی سی ایل سروس نہیں دے سکتی۔تو سیٹ لے کر لوگوں کے رقوم واپس کرے ۔ انہوں نے کہا ۔ کہ حکومت ان کے مسائل پر فوری توجہ دے کر حل کرے ۔ بصورت دیگر سنگین اقدامات اٹھانے پر مجبور ہوں گے جس کی تمام تر ذمہ داری حکومت اور اسمبلی نمایندگان پر ہو گی
آپ کی رائے
