تازہ ترین اپ ڈیٹس January 27th, 2021 3:43 AM
ڈپٹی ڈائریکٹرز کالجز، ایسوسیٹ پروفیسر عبدالروف مختصر علالت کے انتقال کرگئے
ہنزہ (اجلال حسین) ڈپٹی ڈائریکٹرز کالجز گریڈ 20کے آفیسر ایسوسیٹ پروفیسر عبدالروف مختصر علالت کے بعد اسلام آباد میں انتقال کر گئے۔
گزشتہ روز ہنزہ علی آباد میں محکمہ تعلیم گلگت بلتستان کالجز کے اعلیٰ حکام کے علاوہ سینکڑوں افراد کی موجودگی میں نماز جنازہ کے بعد انہیں آہوں اور سسکیوں میں سپرد خاک کردیا گیا۔ مرحوم کی عمر تقریبا56 برس تھی۔ گزشتہ ایک سال سے بحیثیت ڈپٹی ڈائریکٹرز کالجز گلگت میں سرکاری ڈیوٹی پر تعینات تھے۔ سوگواروں میں بیوہ، دو بیٹے اور دو بیٹیاں شامل ہیں۔
مرحوم پروفیسر عبدالروف نے اپنی ملازمت کے دوران گلگت بلتستان کی مختلف کالجوں میں بھی بحیثیت پرنسپل خدمات سرانجام دی تھیں۔ مرحوم نے بالخصوص ضلع ہنزہ کے واحد ڈگری کالج علی آباد میں بحیثیت پرنسپل تعیناتی کے دوران کالج کی تعمیر وترقی میں اہم کردار ادا کیا تھا۔
پروفیسر مرحوم ایک علم دوست، ہردل عزیز اور عوام دوست شخصیت کے مالک تھے سرکاری ڈیوٹی کے بعد علاقے کے مختلف سماجی کاموں میں رضاکارانہ طور پر دن رات سرگرم رہتے تھے۔ جبکہ اسماعیلی کونسل ہنزہ میں بھی مختلف اعلیٰ عہدوں پر فائز رہ چکے تھے۔
مرحوم کی اچانک موت پر علاقے کے سیاسی، سماجی اور مذہبی اداروں کے سربراہان نے خاندان کا ساتھ دلی تعزیت کا اظہار کرتے ہوئے دعا کی ہے۔
