چترال کے معروف شاعر سید صدام علی انداز ؔ کا نعتیہ مجموعہ ’’عقیدتو گمبوری‘‘ ادارہ نوائے چترال کے زیر اہتمام شائع

 لاہور (نیوز ڈیسک) چترال کے مشہور و معروف غزل گو شاعر سید صدام علی انداز ؔ کا شاندار نعتیہ مجموعہ ’’عقیدتو گمبوری‘‘ ادارہ نوائے چترال نے شائع کرکے جہاں کھوار زبان و ادب کی ترقی میں اضافہ کیا ہے وہاں مداح رسول اور عشق رسول ﷺ سے سرشار ختم نبوت کے پروانوں کے جوش اورو لولے میں بھی شاندار اضافہ کیا ہے 55صفحات پر مشتمل یہ شاندار تصنیف منظر عام پر آ گئی ہے جو چترال کے ممتاز ادیبوں اور شاعروں کی تقریضات سے مزین ہے دیدہ زیب ٹایٹل کے ساتھ یہ شاندار تصنیف چترال اور پشاور کے بک اسٹالوں پر دستیاب ہے۔

رپورٹ کے ساتھ کتاب کا ایک مختصر سا جائزہ اور نمونے کے کچھ کلام بھی پیش کئے جارہے ہیں۔

عرض ناشر در کھوار …………..

صدام علی اندازؔ چھترارو ای نوجوان غزل گو شاعر بیکو سوم جستہ جستہ شعرو شاعریو تان بچین ای اہم پیشہ جوشی ہے سوم انتھائی محبت دی کورویان ۔ عشق مجازیار نسی عشق حقیقیو وشکی گیک دی ہو ای اہم اقدام شیر۔ نبی کریم ﷺ و سوم محبتو اظہارو بو شیلی اندازہ کوری اسور ۔تان شاعریوں معنی دار ساؤزی یقیناًحراج تحسینو قابل کوروم کوری اسور ۔انداز ؔ صائب متے اطلاع دیکو اوا بو خوشان ہوتم ،و ا انداز ؔ صائبو سوم شانہ بشانہ جوست بیتی ہنون عشق رسولار ٹپ ہیہ ہردی چوکونو کتابو چھاپ کوری پسہ پروشٹہ لاکھیتام ۔مہ استاذ محترم جناب مولا نگاہ نگاہ صائبو اوچے چھترارو سرزمینو عشق رسول ﷺ سار ٹپ ہردیو مالک مہ نو خوش یار دوست مولانا نقیب اللہ رازیؔ صایبو تقریضار اچی مزید لو دیک ’’چھوٹا منہ بڑی بات ‘‘ رے اردو محاورو مصداق بوئے ۔اللہ تبارک و تعالی ہیہ نعتیہ مجموعو تمام راکان بچے نجاتو ذریعہ کورار ، وا کارکوراکان ہردیان عشق رسولاؐرسرشار کورار ۔وا مزید دی ادارہ نوائے چترالوتے ہموش کورمہ پروشٹی بی حصہ گانیکو مووقع دیار ۔۔آمین

حافظ نصیر اللہ منصور
چیف ایگزیکٹو ادارہ نوائے چترال لاہور

صدام علی اندازؔ وحمدونعت………. مولانگاہ نگاہ ؔ

نہ میرے ذکرمیں ہے صوفیوں کاسوزوسرور

نہ میرا فکر ہے پیمانہ ثواب وعذاب

خدا کرے کہ اُسے اتفاق ہومجھ سے

فقیہہ شہر کہ ہے مَحرمِ حدیث وکتاب

حمدونعتان سورا مشتمل ہیہ کتابوسارپروشٹی ہیہ نوجوان شاعرو تان جوخورکتاب چھاپ بیتی رویان غیچھوپروشٹہ شینی ۔قلموپھوربے خلوص بیکارپروشٹی تان ہورو ترویو کتاب دی حمدان اوچے نعتان تاجوسورودیتی ترویو مکالاپسہ پروشٹہ گویان۔

ہیہ بوخوشانیوبش لُوکہ سیدصدام علی اندازؔ تان تت بپوواروسوم بوہردیارمحبت کورویان وا ہرصنفہ شاعری کوریکوکھوششوکویان۔حالانکہ ہنون زمانہ ہوروعمرونوجوان روئے کھواروغیچہ دوش کوری پھارنیزی پیچیکوچق باؤغیچی گونیان ۔اندازؔ تان کھواروسوم محبتوہیہ اندازتان کہ بہچیتائے تھے۔اندازہ غلط نوکہ ہس ہیہ قسمہ کتاب ہرسالی نو،بچومکہ ہرمَسی دی نیویشکوبوئے ۔ہوروپروشٹوہے جوکتاب غزالان اوچے نظمان مجموعہ اوشونی کہ ہیتان نام ہردیواشرو اوچے شکست آروز،بیتی اسپہ غیچی گونیان لش لوڑین کی بویان ہیہ نوجوان شاعرو نزداہوروشاعری پختہ بیتی شیرکہ نوہے عمراگل اوچے بلبلوذکران قافیان اوچے ردیفانتے حوالہ کوری تان ہردیولینوبچھیریکوژاغاتان شاعریوسوروحمدونعتوتاجودیک کیہ ہش اسقان وکھوستوکوروم نو۔حمدو نعت نیویشک بومشکل کوروم کوریکوہے بچن بوعلمواوچے مطالعوضرورت ۔حمدنیوشیک ،نعت نیویشکوسارچیق اسقان دی ۔کوریکواللہ تعالولوٹ شانوہوش کوریک ہتوغوکندوری کہ اشتکھین ہوئے وادی انسانی علم اوچہ عقل کمی کونی مگم ہے نسبتہ نعت نیویشک ہیہ وجہین مشکل کہ نعت نیویشاک تان پیغمبرﷺو محبتونشابوپروشٹی کہ بغائے کفرا توریکوخدوک بوئے وایاعام انسانان سوم پراخروئے کوری تان نیبوؐکہ اشتیکھتائے نبیوؐ شانوسوم بے قدری بوئے ہیغین دیتی نعت نیویشاکوہمیشہ کوتیرودامتوکوسلیک بوئے ۔واہر قلم لکھیکاتان سوم پھوئی کوروم کوریلیک بوئے۔

صدام علی اندازؔ بوبواسکوردی واپھئٹی بحراحمدوچے نعت نیویشی اسورواہوروخیالان اوچے ادائیگیان ہرکھوارراک واہوش کوراک چت پتہ تان داراکہ دوئے ہیہ دی ہوروشاعریوای تنہاصفت ۔وا صدام علی اندازوؔ حمدیہ ونعتہ شاعریولوڑین کی بویان ہروش سارئیران کہ مدراسوجوچیق طالبان تان موژی وحدانیتوواچے راسالتو باراکروحوکروحو مشقولگیان ہنگہ انگیتی ایغوسوم کورونیان ۔ہیہ قسمہ اسلامی خیالاتن ایغواچتوغیرداؤ غیچی گونیان ۔ہموش قسمہ شاعری نوجوان نسلواوچے معاشروعام رویان بچے ژانوویزوسارکم نو۔

چھترار بطنہ دروسوسر زمین ہمیشہ تمدنواوچے ادب ماڑ بہچی شیر واانجمن ترقی کہوار ونیچواویلوصدروکہوارومحسن شہزادہ حسام الملک مرحوم دی ہموغارتان اوشوئے کہ ہتوغوتقریراوچے تحریر کھوارزبانوبچن سندوحیثیت لکھونیان ۔عام طورکہ لوڑین ہوئے کھواراصل تمدنواوچے تہذیب چھتراروخورژاغان نسبتہ دروسہ پروشٹوقسمہ تان موجود شیر۔حال ہیہ کی افارگیاک پنجابی ،اڑغانی ،کابلی واخورزبانوروئے چھتراروت گیاوا نیچواولادروسہ قدم لکھونیان مگم ہمونیہ پت ہیارا کھوارتمدنواوچے رسم ورواجان پھوپھوک دی بدل کوریکونوبیتی اسونی۔دورسوسرزمینہ امین الرحمان چغتائیؔ صاحبو،نقیب اللہ رازیؔ صاحبوغون اُستاد شاعرانن دی اسونی وا ہیرااساک نوجوان شاعرانن مثلاً فیض الباری بیگان ؔ ،ارشاد عالم مکررؔ ،محمدسلیم کاملؔ ،اکبرعلی عاطفؔ ،غلام رسول بیقرار ؔ کیسو،فداء الرحمان فداؔ مرحوم واخورتمام شاعرانن اسپہ کھوارزبانوڈانگوکوٹھوجاشوسیان ۔

ہانسے ادبوہے چھیروغوچھاراشون دیتی اوغ پئیرونوجوان شاعرصدام علی اندازؔ دی ریچاردَپ لکھی دروسہ گیتی ہیتان جیراپازنیزی روپھی اسپہ افسی اریر۔

وا اَدبوہے نہنگان سوم بٹابٹ نیسی تان خرچواوچے محنتوسورا تروئی کتاب اسپہ پروشٹہ الائی۔ہیہ ہے شاعروتان زبانواوچے تمدنوسوم بوزیاد محبتوثبوت شیر۔ہیہ سلسلہ اوا نوائے چترالوادبی اداروسوم دی فقط دنیسن ای کہ ہیس کہوارزبانوترقیوبچین چھتراروتمام شاعرانن اوچے ادبیانن نیویشیرومسودان اِشاعتوشابوکانہ دیریشی کوری پروشٹہ انگویان۔اوافخرکورومان کہ نوائے چترالوچیف ایڈیٹرحافظ نصیراللہ منصورمہ تان شاگرد بیکوسوم جوستہ مہ اژی بوردیردیہوای علمی وادبی خاندانوسوم تعلق لکھویان ،ہیس کہ تان کھوارتمدنوترقیوکھوششونواریرخورکاکوئے۔

اوا صدام علی اندازوؔ کتابووارزارگنی پونگہ پت جم اندوژی لوڑیتام متے بوخال پرائے مہ اُمیدشیر کہ ہوروشاعری انوسارانوسوتے ترقی کوئے۔ہے سوم جوستہ اوا تان ہے برخورداروت ہیہ نصیحتودی کومان کی ہیس تان سارعمرالوٹ شاعرانن سوم شوئے وشیلی تعلق لاکھی کوروم کورار۔کوریکوشاعری یاادب صرفی تان موژی ایغوقدروہوش کوریکوسوراشاخل واخل باوگوئے کوریکوکہ کیچہ کی سورمووقدرو،زرگارہوش کویان شعروقدرودی سخنوررہوش کوئے تان ساززازقان قدروکہ کورین ہوئے رویوتان قدردی زیادباؤگوئے ۔

عزت گانیکوبچے عزت بوژیلیک بوئے ۔تان چمخووخیک دی اشتکھیروا۔

مُشک آنست کہ خودببویدنہ کہ عطاربگوید

مہ ہیہ مشورہ دی شیر کہ پھوک درونگاربحراشاعری کی اریر ہیہ شاعروبوالفاظان اوچے خیالانتے فراخ ژاغہ نیسر ۔اسکوردی بحراژاغہ کمی کویان ۔شیلی الفاظ شعروزوالوکونی وازوالواشاناری ہیچ کوس دیش نوبوئے۔تان کتابو سورا تبصرہ نیوشیکوبچے مہ تان یادی الائے اوااندازؔ صاحبوبوبوشکرگزار۔خالق کائنات ہوروخیالہ اوچے قلمہ برکت پیچھار۔(آمین)

مولانگاہ نگاہؔ
ریٹائیرڈپرنسپل اف تریچ حال موضع سنگورچترال

نوعمرنعت گوشاعروعقیدت……… پروفیسر مولانا محمدنقیب اللہ رازیؔ

شاعری اسقان اشناری یامشکل ہیہ ای تنہابحث کاکہ شاعرنوہتوغوسوم ہیہ لُو دی عبث ۔مگم شعری ذوق لکھونیان ہتیتان نزداشاعری مشکل نومگم اہم اشناری ہے سوم جوستہ دی ہتت تان شاعریوسوراہیہ ظلموکونیان کہ ہے فنوبارا ہچ کیاغ ہوش نوکوری دی ہرکیاغ ہوش کومان رے دعویٰ کونیان واہتیتان شاعریوموضوع دی پورازندگی صرف غزل یاکڑوم نویشیکہ تان بہچوران ہموش قسموشاعرانن نتے پورا شاعرریک دی ای قسمہ ظلم۔

نوجوان شاعران ہیہ زمانابوبونویوکوشاعری کونیان ،مگم صرف وے اُستاذوشاعری بیکن ہیتانتے وے سندوریک دی شاید مناسب بوئے وا دی ہیتان شعری ذوقاربوبولوٹھورون دی متاثرضروربونیان۔

حمدونعت نویشیک شاعریواصل مقصدشیر۔کیہ شاعرکہ ہمی جواصنافہ تان ذوقوویریغ کوریکونوبیتائے ہاسے تان شعری وزنو تان کمیران۔نوجوان شاعرصدام علی اندازؔ کندوری خوش قسمت شاعرکہ ہسے بوکم عمریہ نعتیہ مجموعہ ترتیب دیتی منظرعامہ انگیکوبچے میہہ بوتیتائے کہ ہوروبہکی بہکی نوجوانان حمدونعتوصحیح تعریفوتان ہوش نوکونی۔وا ہوروہم عمرشاعرانن بوکم کورانعت یاحمدنویشیکوپوشین بویان۔ہیہ ہوروعقیدتواوچے محبتوای نشان ہیہ وجہ کہ ہے مجموعوتے نام دی عقیدتوگمبوری،لکھی اسور۔ہموغارپروشٹی اندازؔ صائبوجوخورکتاب دی چھاپ بیتی شینی۔ہتیتان موژار ہردیواشرو واشکست آرزوجوکھاڑغزل وچے نظمہ مشتمل شعری مجموعہ ہمی کتابین گیروبعض غزل کافی مشہوردی بیتی شینی شاید ہیہ وجہ کہ ہے فنہ شرشتوبیتی حمدونعتواصنافہ دی قلم آزمائی کوریک شروع اریر،بلکہ نوشیکوسوم جوستہ چھاپ کوریکوبجے دی محنت واہمت اریر۔

عام شاعریوچے حمدو نعت نیوشیکوموژی بوفرق شیر۔عام شاعریہ محبوبوچے مطلوبوصحیح دی اشتکھین بوئے واچنگی دی۔توغوحیثیتارزیات (مبالقہ)دی بوئے ۔مگم حمدونعت نیویشاوا کہ چنگی لُودین ہوئے کفرا تورین بویان صحیح لوودی کہ بے ثبوت دین ہوئے گناہنگاربین بویان وااللہ پاکوچے توغورسولوؐشانوکمئین کہ ہوئے وا دی کفراتورین بویان ،وا کہ رسول پاکوؐمقاموہوش نوکوری اللہ پاکواوصافان کہ توغوبچے استعمال کورین ہوئے تھے انسان شرکہ تریران واہے سوم جوستہ معمول بے احتیاطیہ بی کہ بے ادبی کورین ہوئے تھے قرآن مجیدا ارشادبویان کہ ہے سوراانسانوکردونیک عمل دی تباہ بونیان۔

رسول ﷺ وسوم محبت کوریک وا ہتوباراتان عقیدتواظہاروکوریک ہرکوس بچے نیک بختیوعلامت مگم ای شاعروسورا لازم کہ ہاسے رسول صلی اللہ علیہ وسلمو سوم کہ ایمانورشتاتعلق لکھویان تھے ہاسے تان فنہ دی ہے تعلقوتے اہمیت دیارصرف شعری دیوانوشروغہ نیوشیکوبچے ای ویچھیرونعت شامل کوریک حضورﷺ وسوم بوناانصافی۔

اواہش دی نوریمان کہ صدام علی اندازؔ صائب مکمل نعتیہ مجموعہ انگینتی شاعریہ سفوسارتوری نیسائے ،بچونکہ اندازؔ صائب ہیہ بچے بوبوشاباشیوقابلہ کہ ہیس ناپختہ عمراحمدونعت نیویشی بچونکہ نعتیہ مجموعہ چھاپ کوری ای لوٹ اعزازولائق ہوئے ۔وا سفوسارنوعمرنعت گوصاحب کتاب شاعربیکوشرفوحاصل اریر۔

عقیدتوگمبوریہ،،حمدزیات شینی وانعت کم واکھاڑان طرزای رنگہ تان سادہ وا شوخسیروخیالاتان سوم جوستہ عقیدتوالفاظان ٹھنگارخامہ انگیتی وا بیندارپھونہ التی بی دیکوکھوششوکویان ۔ہیہ فنومشکلاتان وچے باریکیان لوڑی وا اندازو ؔ نوعمریو پروشٹہ لکھی ہوروذوقوچے صلاحیتاتانتے شاباشی دیلی بویان ۔کوریکو کہ ہے عمروشاعروذہنی حمدونعتوخیال گیک تان بولوٹ کوروم۔ واہیہ مجموعہ ہوروہم عمرشاعرانن بچے ای لوٹ سبق ہیہ مجموعہ اندازؔ صائبو حمدونعت نیوشیکواولوتجربہ شیرہیغین دیتی ہیراکہ کمی کہ غیچی گیروبیرانی دی ہتیتان نظرانداز کوریلی ۔مہ اُمیدشیر کہ اندازؔ صائب ہیہ سلسلو ائندہ دی جاری ساتیر۔وا ہیراردی شیلی عقیدتوگمبوریان ہرہرگرزینہ کیشیکوبچے میہہ بتیر۔کوریکوحضور صلی اللہ علیہ وسلمو صفت بے کھنارتھے ہتیتان بیان دی بے کھناربیلی۔واشک شاعرانن دی کم ازکم عقیدتوگمبوریولوڑی پھوک کیہ مجموعہ چھاپ کوریکوبچے پروشٹی گیلی۔

پروفیسرمولانامحمدنقیب اللہ رازیؔ
ایس بی بی یو کیمپس چترال

پھوک لُومہ تان دی…….. سید صدام علی اندازؔ

اللہ تعالو شکریوکوری کورا تاریکونوبوم کہ بوکم عمرامہ غون گناہگاربندوتے تان وچے تان حبیبوؐصفاتان کوریکوتوفیق پرائے ۔ہیہ مہ بجے بوفخروبش لُوکہ اواتان حمدو وانعتیہ مجموعوپسہ پروشٹہ التام ،اللہ پاکوصفات بوبے کھنارواتوغوحبیبوصفات دی ہش تان بے کھناراللہ پاکو صفاتان کوری کوراتارین نوبوئے۔نہ توحبیبوصفاتان کوری کورا تارین بوئے۔مہ ہیہ کم عمرا کیاکہ غلطی ہے کتابہ پسہ غیچی گیروبیرانی ہتان متے معاف کورورکوریکو کہ مہ شوق اوشوئے کہ اوا دی حمدواوچے نعتوکتاب انگیکوبیروا رے۔ ہنون اللہ پاک ہاتے ارمانومتے پورا اریر۔مہ ترویوکتاب حمدوچے نعتومشتمل مجموعہ عقیدتوگمبوری ،،نامہ پسہ پروشٹہ شیر ہموخار پروشٹی مہ جوخورکتاب غزلووچے نظمان سورامشتمل مجموعہ پسہ پروشٹی گیتی اوشونی۔

ادارہ نوائے چترالوزیراہتمامہ شائع بیتی مہ تروئی کتاب پسہ پروشٹہ شینی ۔ مہ اویلوکتاب ہردیو اشرونامہ پسہ پروشٹۃ گیتی اوشوئے وامہ جووکتاب شکست اَرزونامہ پسہ پروشٹہ گیتی اوشوئے ،واہانسے ترویوکتاب حمدوچے نعتوسورامشتمل مجموعہ عقیدتوگمبوری نامہ پسہ پروشٹہ شیر۔

ادارہ نوائے چترالوزیرنگرانیہ شائع بیتی مہ تروئی کتاب پسہ پروشٹۃ شینی۔اللہ پاک ہیہ ادارہ نوائے چترالوتے مزید ترقی دیار،وا ادارہ نوائے چترالوتمام ملگیریان عمرابرکت پیچھارکہ ہاتت نوجوان شاعرانن شیرشتو کوری ہتان سوم تعاؤن کوری گونیان۔مہ ژان قربان ادارہ نوائے چترالوتے کہ ہاتت مہ سوم بھرپور تعاؤن کونیان مہ بوزیات محبت شیرنوائے چترالوسوم ۔مولاناقاضی محمدانس مرحوم تا ن زندگیہ تان نوجوان شاعرانن سوم بھرپورتعاون کوراواوشوئے۔اللہ پاک ہتوقبرانورکورار۔وا مولاناقاضی محمدانس صاحبو حقوتے توریکاراچی حافظ نصیراللہ منصورصاحب،اسداللہ حیدرصاحبوگانی شیلی خدمت کوری انگویان۔وا اوا قاری عبدالناصرجمال صاحبووا مشہورشاہد صاحبوبوشکریوکومان کہ ہاتت نوجوان شاعرانن سوسم شیلی تعاون کوری بوجم خدمت انجام دونیان اللہ پاک ہیہ ادارو تمام ملگریان عمرا برکت پیچھار۔واای بار خوراوا ناموگانیک ضروری جاشومان حافظ نصیراللہ منصورصاحبوکہ ہسے مہ بوزیات حوصلہ افزائیوکویان۔واہیغاراچی اواتان خوش استاددی واملگیردی محترم جناب فیض الباری بیگانؔ صاحبو شکریوکومان کہ ہاسے ہروخت بوزیات مہ حوصلہ افزائیوکوری وامتے مشوراپرائے۔واہنون متے بوخوشانی حاصل ہوئے اواتان ہیہ حمدونعتیہ کتابوسوم بوخوشان اسوم کہ اواتان ہیہ کم عمرااللہ پاکوچے توغورسول صلی اللہ علیہ وسلموصفاتان کوری کیاغ کہ مہ موژا اللہ پاکو اوچے تورسولوؐ محبت مہ ہردیہ شیرہتان کتابی شکلہ پسہ پروشٹہ التام کیہ غلطی کی ہے کتابوموژو شیرانی پسہ سارمعافی مشکیمان کوریکوکہ اوانہ عالم،نہ حافظ،نہ دَشمان ہانی متے علم نیکی حمدونعت نیویشک بوگیران کوروم ہے بچن بوعلمواوچے مطالعوضرورت شیر،حمدریکوپھوک اسان دی کوریکو اللہ تعالولوٹیوتعریفوکوسان نعت نیویشیک بوگیران کوروم کیچہ کی محترم استاذمولانگاہ نگاہؔ صاحب تبصرہ نیویشی اسورکوتیروداموتوکوسیلک بوئے وا قلم لاکھواتان سوم پھوئی کوروم کوریلک بوئے رے ہتیغین دیتی مہ ہیہ کتابہ حمدزیات نعت کم شینی وا کتابوسورا تبصرہ کوریکو بچن پروفیسر مولانا محمدنقیب اللہ رازی ؔ صاحبو خصوصی شکریوکومان کہ ہاسے تان قیمتی وختاروخت نیزی مہ کتابولوڑی ہے سوراتان قیمتی رائیو نیویشی متے پرائے وا کتابوموژوکیہ کمی بیشی کی اوشونی ہیتان دودیری کوری مہ حوصلہ افزائیواریر۔

اللہ پاک تو ژانہ ومال عمرا برکت پیچھار۔واہیغاراچی اوا محترم استادانانن استاد کیہ تعارفومحتاج نوتان استادمولانگاہ نگاہ ؔ صاحبوشکریوکوری کوراتاریکونوبوم کہ ہاسے تان قیمتی وختاروخت نیزی تان زرین خیالاتان اظہارو کوری تبصرہ نیویشی اسور۔وا اُمید شیر کہ تان تعاونو ہموش تان مہ سوم جاری لاکھوئی۔وا اواتان خوش استادامیراللہ عقیبؔ صاحبو دی شکریوکوری کورا تاریکونوبوم کہ ہسے خصوصی تان محبتواوچے خلوصو سورا مسودومکمل لوڑی شیلئی کوری متے حوالہ اریراللہ پاک ہتوکیہ کہ ارمان شیرہتوغوپورا کورار(امین)۔

وا عقیدتوگمبوری ادارہ نوائے چترالوزیرتعاونہ شائع بیتی بوسونیوآغازوگنی پسہ پروشٹہ شیر۔وا اوا کتابوکمپوز کوریکو حوالہ مہ قوم دی مہ دوست دی اوا ادارہ نوائے چترالو انفارمیشن افیسر ،واڈیلی چترال ڈاٹ کامو چیف ایڈیٹرمحترم جناب سیدنذیرحسین شاہ نذیرؔ صاحبوبوشکرگزارکہ ہاسے تان بومصروف وختاروخت نیزی مہ کتابوشئیلی کوری کمپوز اریر۔وا مہ پروشٹو کتاب شکست آروزودی شیئلی کوری کمپوزکوری اسیتائے۔وا اوا اُمیدکومان کہ مہ چھورو کتاب نظمواوچے غزلانن سورامشتمل مجموعہ خورگویان 2018اللہ پاک خیرکی اریر پسہ پروشٹہ گوئی وا ہتودی ہموش تان شیئلی کمپوز کوری متے حوالے کوئی۔وا اوامحمدجعفرعلی ملتجیؔ صاحبودی شکریوکومان کہ شیئلی کوری مہ حوصلہ افزائیواریر۔اوارحمت قیوم غمگین ؔ صاحبو،امیراللہ شہزادؔ صاحبو،غفارالزمان سرور ؔ ،سعیدکائناتی ؔ صاحبواخورتمام ملگیریان کوس کی ناموگانیکونوبیتی اسوم سفان شکریوکومان کہ ہاتتے ہمیشہ مہ حوصلہ افزائیوکوری مہ شیرشتو کونیان۔وا فداالرحمن فداؔ مرحومو ناموگانیک ضروری جاشومان کہ ہاسے انجمن ترقی کہوارحلقہ دروسو لوٹھوریو بوشاندار طریقہ انجام دیتی اسپہ تے ای اہم پلیٹ فارم اچی پیچھی بی اسور ہاتوخدمات ہمیشہ اسپہ رہنمائی کونی کہوارچھاپ ناموسوراای ر سالہ شروع کوری اسیتائے ہاتووفات بیکاراچی ہاسے دی بندہوئے۔ اللہ تعالیٰ ہاتوقبرا نورکورار۔فداؔ صاحبوحقوتے توریکاراچی نوجوان شاعرانن تاج وابوپرخلوص ملگیری اکبرعلی عاطفؔ صاحب ای جودفعہ کہوارچھاپو تان محنتوسورا منظرعام انگیتی اسیتائے ۔وا آخراوا تان خوش برار قاسم علی خان صاحبو ہردیاری مشکورکہ ہاسے زندگیوسفرامہ سوم دست بازو ساوزبیتی مہ رہنمائیوکویان۔اللہ پاک ہتوتوعمرابراکت پیچھار(آمین)۔

سیدصدام علی اندازؔ (نمونہ کلام)

حمد باری تعالیٰ

تورحیم مہ خدائے مہربان مہ خدائے

شیرین ژان تہ سورابائے قربان مہ خدائے

گناہ گارتہ بندہ سیاہ کار تہ بندہ

توکوروس رے معاف اُمیدوار تہ بندہ

تہ کرم مہ آرو مسلمان مہ خدائے

تورحیم مہ خدائے مہربان مہ خدائے

مہ پیدا توآرو مہ ماراک دی توتان

مہ رازق دی توتان مہ ساتک دی توتان

مہ بہچاوے ہمیش توخوشان مہ خدائے

تورحیم مہ خدائے مہربان مہ خدائے

سوال گار تہ پروشٹہ التجا کورومان

مہ اُمید تہ سار شیرتھے دعا کورومان

شب روز یادئیاو تہ نامان مہ خدائے

تورحیم مہ خدائے مہربان مہ خدائے

پک تازہ حالتہ مہ پیدا توآرو

ای بندہ مہ کوری پک تازہ توآرو

بے طلب متے پراؤ تو ایمان مہ خدائے

تورحیم مہ خدائے مہربان مہ خدائے

د رونگ چھوئے درونگ انوس سورسجدادی کی ہوئے

ہردیار نو نیسیرژان فدادی کی ہوئے

تہ حقو ہوش کوریک بوگران مہ خدائے

تورحیم مہ خدائے مہربان مہ خدائے

اندازؔ ای بے بس ای عاجز تہ بندہ

بو مجبور ای غریب ای ناچیز تہ بندہ

توبو لوٹ بے مثال وا تہ شان مہ خدائے

تورحیم مہ خدائے مہربان مہ خدائے

***