گلگت بلتستان میں 5G اور تیز رفتار انٹرنیٹ ناگزیر، فوری اسپیکٹرم نیلامی کا مطالبہ
اسلام آباد: نگراں وزیر اعلیٰ گلگت بلتستان، جسٹس (ر) یار محمد نے کہا ہے کہ خطے میں تیز رفتار انٹرنیٹ اور مضبوط ڈیجیٹل کنیکٹیویٹی اب ایک بنیادی ضرورت بن چکی ہے۔ ان کا کہنا تھا کہ کمزور انٹرنیٹ سہولیات کے باعث نہ صرف مقامی آبادی بلکہ سیاحوں کو بھی شدید مشکلات کا سامنا ہے۔
انہوں نے وفاقی حکومت پر زور دیا کہ گلگت بلتستان میں 5G سروس کے اجرا کے لیے جلد از جلد اسپیکٹرم آکشن کرایا جائے تاکہ جدید ڈیجیٹل سہولیات کی فراہمی ممکن بنائی جا سکے۔
ان خیالات کا اظہار انہوں نے وزیر اطلاعات و آئی ٹی گلگت بلتستان غلام عباس کے ہمراہ وفاقی وزیر برائے آئی ٹی و ٹیلی کام شزا فاطمہ سے ملاقات کے دوران کیا۔ ملاقات میں ملک میں ڈیجیٹل تبدیلی کے عمل اور گلگت بلتستان میں ٹیکنالوجی کے فروغ سے متعلق اہم امور پر تفصیلی تبادلہ خیال کیا گیا۔
وزیر اعلیٰ نے یونیورسل سروس فنڈ (USF) سے متعلق مسائل کے فوری حل کی ضرورت پر زور دیتے ہوئے کہا کہ دور دراز علاقوں میں انٹرنیٹ اور ٹیلی کام سہولیات کی بہتری کے لیے عملی اقدامات ناگزیر ہیں۔ انہوں نے وفاقی وزیر کو گلگت بلتستان کے دورے کی دعوت بھی دی تاکہ زمینی حقائق کا جائزہ لے کر مؤثر فیصلے کیے جا سکیں۔
اس موقع پر وفاقی وزیر شزا فاطمہ نے کہا کہ وزیراعظم شہباز شریف کے "ڈیجیٹل نیشن پاکستان” وژن کے تحت ملک گیر ڈیجیٹل تبدیلی پر تیزی سے کام جاری ہے۔ انہوں نے کہا کہ آزاد کشمیر اور گلگت بلتستان کی ترقی پر خصوصی توجہ دی جا رہی ہے تاکہ ان علاقوں کو قومی دھارے میں شامل کرتے ہوئے جدید ڈیجیٹل سہولیات فراہم کی جا سکیں۔
ملاقات کے دوران نیشنل ڈیجیٹل ماسٹر پلان کی تیاری اور اس پر مؤثر عملدرآمد پر بھی گفتگو ہوئی، جبکہ ملک بھر میں ڈیجیٹلائزیشن کے عمل کو مزید تیز کرنے پر اتفاق کیا گیا۔ اس کے ساتھ ساتھ چاروں صوبوں اور گلگت بلتستان میں یکساں ڈیجیٹل ترقی یقینی بنانے پر زور دیا گیا۔
فریقین نے مختلف شعبوں میں ڈیجیٹلائزیشن کے فروغ کے لیے مربوط حکمت عملی اپنانے پر تبادلہ خیال کیا۔ وفاقی وزیر نے پاکستان ڈیجیٹل اتھارٹی کو ہدایت دی کہ گلگت بلتستان میں نوجوانوں کے لیے روزگار کے مواقع بڑھانے اور ڈیجیٹل معیشت کے فروغ کے لیے ایک جامع منصوبہ تیار کیا جائے۔
ملاقات میں جدید ٹیکنالوجی کے استعمال، ڈیجیٹل معیشت کے فروغ اور بالخصوص سیاحت کے شعبے میں ڈیجیٹلائزیشن کے ذریعے بہتری لانے پر اتفاق کیا گیا، جبکہ ڈیجیٹل ٹورازم کے فروغ پر بھی زور دیا گیا۔
آخر میں دونوں فریقین نے گلگت بلتستان میں ڈیجیٹل ترقی کے فروغ کے لیے مشترکہ اقدامات جاری رکھنے کے عزم کا اعادہ کیا۔
آپ کی رائے
