چھوٹے سکیل کے ملازمین کے تبادلے غیر ضروری ہیں، کام متاثر ہورہا ہے، ملک نوشیروان ٹھیکیدار

چلاس(بیوروچیف)پی ڈبلیو ڈی ورکس ڈپارٹمنٹ کے چھوٹے ملازمین کے استور تبادلے کے بعد دفتری معاملات شدید متاثر ہوئے ہیں۔فوری طور پر ان کے تبادلے منسوخ کر کے دوبارہ تعینات کیا جائے۔ملازمین کے تبادلے کے بعد دفاتر ویران ہوگئے ہیں اور ٹھیکیدار برادری کے لئے مشکلات کا سامنا ہے۔ان خیالات کا اظہار کنٹریکٹر ملک نوشیر وان نے اپنے ایک بیان میں کیا۔ان کا کہنا تھا کہ چھوٹے ملازمین کا تبادلہ سمجھ سے بالا تر ہے۔ملازمین کے تبادلے کا کوئی خاص فائدہ بھی نہیں ہورہا ہے۔البتہ دفتری معاملات شدید متاثر ہوئے ہیں۔انہوں نے چیف سیکرٹری اور سیکرٹری ورکس سے معاملے کا نوٹس لے کر تبادلے کو منسوخ کرنے کا مطالبہ کیا ہے۔