لاک ڈاون سے بہت نقصان ہوا ہے، تجار یونین چترال کی دہائی، بازار کھولنے کا مطالبہ

چترال(نمائندہ) تجار یونین چترال کی جانب سے جامع مسجد شاہی بازار چترال میں بازار کھولنے کے حوالے سے میٹنگ منعقد ہوئی۔میٹنگ میں چترال کے مختلف بازاروں سے سینکڑوں کی تعداد میں تاجر برادری کے چیدہ چیدہ دکانداروں نے شرکت کیں۔اجلاس سے شراکاء نے خطاب کرتے ہوئے کہا کہ موجودہ لاک ڈاؤن کی وجہ سے چترال کی تجار برادری کو بے انتہاء نقصان ہوا ہے جسے مزید برداشت نہیں کیا جاسکتا۔اُنہوں نے بازار مکمل طورپر کھولنے کا مطالبہ کیا اور کہا کہ تجار برادری حکومت کی طرف سے جاری کردہ ہدایات پر مکمل طورپر عمل کرینگی۔اُنہوں نے کہا کہ چترال میں بینکوں کے سامنے سینکڑوں افراد جمع ہوتے ہیں اور انتظامیہ انہیں نہیں روکتی جبکہ عید قریب ہے کپڑوں،جوتوں اور کراکری کے دکانات بند کرکے انتظامیہ کی طرف سے غریب عوام پر ظلم کے پہاڑ دھائے جارہے ہیں۔اُنہوں نے کہا کہ صوبے کے دیگر اضلاع میں کاروباری حضرات کے ساتھ انتظامیہ کی طرف سے نرمی برتی جارہی ہے جبکہ ضلع چترال صوبے کا واحد ضلع ہے جہاں پر تجار برادری کے ساتھ سختی کی جارہی ہے۔

اُنہوں نے چترال پولیس اور ٹریفک پولیس کی طرف سے بھی تجار برادری کے ساتھ ناروا برتاؤ پر برہمی کا اظہار کیا۔اُنہوں نے کہا کہ بٹ خیلہ،تیمرگرہ،سوات،دیر اور دروش میں بازار کھلے ہوئے ہیں اور انتظامیہ تجار برادری کے ساتھ نرم رویہ اختیار کیے ہوئے ہیں لیکن چترال میں تجار یونین کی نااہلی اور کمزوری کی وجہ سے چترال کے تجار برادری فاقوں کا سامنا کرنے پرمجبور ہوگئے ہیں۔اُنہوں نے تجار یونین پر عدم اعتماد کا اظہار کرتے ہوئے کہا کہ تجار برادری نے تجار یونین کے صدر اور کابینہ کو بازار کے تجار برادری کی مشکلات کا ازالہ اور دفاع کرنے کے لئے چنا تھا لیکن تجار یونین انتظامیہ کے ساتھ ملکر دکانداروں کو جرمانہ اور دکانوں کو سیل کرنے میں مصروف ہیں اُنہوں نے رمضان کے فوراً بعد یونین کے خلاف عدم اعتماد لانے کا اعلان کیا۔اجلاس سے سابق صدر تجار یونین حبیب حسین مغل نے خطاب کرتے ہوئے کہا کہ اگر انتظامیہ نے جلد چترال کے سارے دکانیں نہ کھولے تو پورے بازار کو بند کرکے یونین کے ساتھ مل کربھرپور احتجاج کیا جائیگا۔

تجار یونین کے صدر شبیر احمد نے کہاکہ لاک ڈاؤن سے دکاندار حضرارت فاقہ کشی پر مجبور ہوچکے ہیں۔ اور ہمارے منتخب نمائندے چترال میں سیاست کررہے اور بازار یونین کو اپنی مفاد کے لئے استعمال کرنے کی کوشش کررہے ہیں جسے کامیاب ہونے نہیں دیا جائیگا۔اُنہوں نے کہا کہ منتخب نمائندوں کو چاہئے کہ وہ اس مشکل گھڑی میں تجار یونین کے لئے اقدامات اٹھائے۔کیونکہ تجار برادری نے ان نمائندوں کو منتخب کرنے میں بھرپور کردار ادا کیا ہے۔اُنہوں نے انتظامیہ پر زور دیا کہ جلد ازجلدپورا بازار کھولا جائے۔اجلاس کے بعد تجار یونین نے دکانداروں کے ایک وفد کے ساتھ ڈی سی چترال سے ملاقات کی۔ ذرائع کے مطابق اجلاس میں بازار کو کھولنے کے بارے میں کوئی حتمی فیصلہ نہیں ہوا۔