پاک فوج نے چلاس میں‌ پی سی آر ٹیسٹنگ لیبارٹری قائم کردی

گلگت (پ ر) ملک میں جاری کورونا کی وباء سے نمٹنے کے لیے پاک آرمی کی کاوشیں جاری ہیں، بحران سے نمٹنے کے لیے پاک فوج ہر اول دستے کا کردارادا کر رہی ہے اور گلگت بلتستان میں بھی صوبائی حکومت اوردیگر تمام سٹیک ہولڈر ز کے ساتھ مل کر مشترکہ لائحہ عمل بھی اپنایا جا چکا ہے جس کے دور رس اثرات نظر آنا شروع ہو چکے ہیں۔صوبائی حکومت اور عوام کی جانب سے پاک فوج کے کردار کو سراہا جا رہا ہے۔ اس سلسلے میں پاکستان بھر میں آرمی کے زیر اہتمام ٹیسٹنگ لیبارٹریز کا قیام بھی عمل میں لایا جا رہا ہے۔ گلگت بلتستان میں بھی وباء پر قابو پانے کے لیے آرمی کی مدد سے ٹیسٹنگ کی سہولت فراہم کی جا رہی ہے، پاکستان آرمی صوبائی حکومت کی بھرپور مدد کر رہی ہے تاکہ وباء کو بے قابو ہونے سے روکا جاسکے۔ پاکستان آرمی کے تعاون سے پہلے ہی گلگت اور سکردو میں دو الگ الگ PCRٹیسٹنگ لیبارٹریز کا قیام عمل میں لایا جا چکا ہے۔ حالیہ دنوں میں کورونا کی وباء سے ضلع دیامر میں مریضوں کی تعداد میں تیزی سے اضافہ دیکھنے میں آیاہے۔ مریضوں کی جانچ اور فوری ٹیسٹنگ کے لیے دیامر ڈویژن کے مرکزی شہر چلاس میں قائم ریجنل ہسپتال میں پاکستان آرمی کی مدد سے ایک اور جدید PCR ٹیسٹنگ لیبارٹری کا قیام عمل میں لایا جا چکا ہے،جہاں کامیابی کے ساتھ کورونا ء کے متاثرہ مریضوں کے ٹیسٹ کیئے جا رہے ہیں۔ یہ لیبارٹری 48گھنٹوں کے اندر کوروناء سے متاثرہ مریضوں کی رپورٹ تیار کرے گی۔

یاد رہے کہ گلگت بلتستان میں پاک فوج کے تعاون سے تیسری لیبارٹری کے قیام کے بعد صوبہ پاکستان بھر میں ٹیسٹنگ کی استعداد کے حوالے سے دوسر ے نمبر پر آچکا ہے۔ سی ایم ایچ گلگت کے پیتھالوجسٹس کی زیر نگرانی مریضوں کے ٹیسٹ کامیابی سے شروع کیئے جا چکے ہیں۔ لیبارٹری کو مکمل طور پر فعال بنانے کے لیے نیشنل ڈیزاسٹر منیجمنٹ اتھارٹی کی بھرپور تکینکی معاونت بھی حاصل ہے، لیبارٹری میں FCNAکے ٹیکنالوجسٹس مکمل جانفشانی سے کام کر رہے ہیں۔ کمانڈر ایف سی این اے میجر جنرل احسان محمود خان کی ہدایات پر سی ایم ایچ گلگت کے ماہرین بھی چلاس میں تعینات کر دیئے گئے ہیں۔چلاس ریجنل ہسپتال میں کورونا ٹیسٹنگ لیب کا بروقت قیام عمل میں لانے پر دیامر کی عوام نے پاک فوج کا شکریہ ادا کیا ہے۔پاک فوج کی جانب سے کیئے جانے والے اقداما ت کی بدولت امید کی جاتی ہے کہ گلگت بلتستان میں جلد کورونا کی وباء پر مکمل قابوپایا جا سکے گا۔ یاد رہے کہ FCNA نے موجودہ بحرانی کیفیت میں نہ صرف ٹیسٹنگ کے سلسلے میں معاونت فراہم کی ہے بلکہ حالیہ دنوں میں صوبے کے مختلف اضلاع میں مستحقین میں راشن کی فراہمی کے لیے ایک میگاریلیف آپریشن بھی پایہ تکمیل کو پہنچایا، یوں گلگت بلتستان کے تمام دس اضلاع میں کُل چھپن ہزارچھ سے سینتیس راشن پیکج مستحق افراد میں تقسیم کیئے جا چکے ہیں۔