کم عمر بچی سے مبینہ جنسی زیادتی، والد اور ہمسایہ نامزد
گلگت: دنیور پولیس نے ۱۴ سالہ بچی کی درخواست پر مبینہ جنسی زیادتی کے الزام میں اس کے والد اور ایک ہمسایہ کے خلاف مقدمہ درج کر لیا ہے۔
ایف آئی آر نمبر 110/26میں تعزیراتِ پاکستان کی دفعات 34، 378-ب اور 377-ب شامل کی گئی ہیں۔ پرچے کا سیریل نمبر 48706ہے۔
ایف آئی آر کے مطابق، بچی نے الزام عائد کیا ہے کہ تقریباً ایک سال قبل اس کے والد نے مبینہ طور پر اس کے ساتھ جنسی زیادتی کی، جو حالیہ دنوں تک جاری رہی۔ بچی کے مطابق گزشتہ تین ماہ سے ایک ہمسایہ بھی اسے مبینہ طور پر جنسی زیادتی کا نشانہ بناتا رہا۔ ایف آئی آر میں بچی نے مزید بیان دیا ہے کہ اسے جان سے مارنے کی دھمکیاں اور دیگر لالچ دے کر خاموش رہنے پر مجبور کیا گیا۔
بچی نے چند روز قبل اپنے اسکول کی دو استانیوں کو مبینہ واقعات سے آگاہ کیا، جس کے بعد اسکول کمیٹی کے ذمہ داران کی مدد سے معاملہ پولیس تک پہنچایا گیا۔ پولیس نے بچی کی درخواست پر مقدمہ درج کرکے مبینہ واقعے کی تفتیش شروع کر دی ہے۔
واضح رہے کہ ایف آئی آر میں عائد الزامات کی تفتیش جاری ہے اور عدالت سے جرم ثابت ہونے تک نامزد افراد کو قانوناً بے گناہ تصور کیا جاتا ہے۔
