رسمِ تاو وادی پونیال کی ثقافت کا روشن چراغ
وادیِ پونیال گلگت سے شندور کی جانب سفر کرتے ہوئے اپنے حسن و وقار کے ساتھ جلوہ گر ہوتی ہے۔ یہ دلکش وادی گاؤں بیارچی سے آغاز کر کے گوپس کے قرب میں واقع گاؤں ہایم اور وادیِ اشکومن میں برگل تک وسعت پذیر ہے۔
یہاں شینا زبان کی مٹھاس گونجتی ہے۔ یہاں کے باسی روایت پرست، محنت کش، مہمان نواز اور اپنی تہذیب سے والہانہ محبت رکھنے والے ہیں۔ پونیال شینا بولنے والوں کی قدیم وادی ہے۔ یہاں کی زبان، موسیقی، پوشاک، بود و باش، رہن سہن، خوراک، گفتگو، زراعت اور میوہ جات پورے خطے میں شہرت رکھتے ہیں۔ پونیال کی ثقافت کو گلگت بلتستان بھر میں قدر و منزلت کی نگاہ سے دیکھا جاتا ہے۔ یہاں کئی روایتی اور ثقافتی تہوار بھی اہتمام سے منائے جاتے ہیں جو اس وادی کی شناخت ہیں۔
ماضی میں صدیوں تک پونیال ایک مستقل راجدھانی کی حیثیت سے اپنی جداگانہ شناخت کے ساتھ قائم رہی اور 1974 تک اپنی انفرادیت کے ساتھ برقرار رہی۔ ایف سی آر کے خاتمے کے بعد یہ راجدھانی اپنے اختتام کو پہنچی۔ اب یہ ضلع غذر کی ایک تحصیل یعنی سب ڈویژن ہے۔ اس طویل تاریخی پس منظر نے پونیال کی ثقافت کو مزید مستحکم، باوقار اور منفرد بنا دیا ہے۔ یہی سبب ہے کہ یہاں کی رسومات آج بھی اپنی اصل روح کے ساتھ زندہ و تابندہ ہیں۔
اگر پونیال کی ثقافت کا خلاصہ چھ الفاظ میں بیان کیا جائے تو وہ ہیں، محبت، مہمان نوازی، روایت، موسیقی، سادگی اور وقار، یہی چھ اوصاف پونیال کے ہر گھر، ہر محفل اور ہر رسم میں جلوہ افروز ہیں۔
انہی رسومات میں سب سے دل آویز اور روح پرور رسم "رسمِ تاوو” ہے، جو شادی بیاہ کی تقریبات میں نہایت اہتمام سے پیش کی جاتی ہے۔
رخصتی سے ایک شب قبل، دولہا کے گھر میں منعقد ہونے والی موسیقی کی محفل کا آغاز رسمِ تاوو سے ہوتا ہے۔ یہ محض ایک روایتی رقص نہیں، بلکہ ایک دعا، ایک علامت اور ایک نئے خاندان کی بنیاد رکھنے کا پرشکوہ اعلان ہے۔
محفل کے وسط میں روایتی چولہا جس کو مقامی زبان میں چانگول کہا جاتا ہے وہ رکھا جاتا ہے اور اس کے اوپر توا رکھا جاتا ہے جس کو مقامی زبان میں تاوو کہا جاتا ہے۔ رسم ادا کرنے والا مرد، جو دولہا کا بہنوئی یا پھوپھا ہوتا ہے، آٹے کا کٹورا ہاتھوں میں تھامے تاوے کے پاس کھڑا ہوتا ہے اور تاوے پر ایک چٹکی آٹا نچھاور کرتا ہے، جسے مقامی زبان میں دوومن کہا جاتا ہے جو کہ خوشی کے مواقع پر نیک شگونی کی علامت کے طور پر پیش کیا جاتا جاتا ہے ۔
اسی اثنا میں دیسی بینڈ پر مخصوص دھن بجائی جاتی ہے جس کو تائے دھنی کہا جاتا ہے، جس کی گونج دلوں کو وجد میں لے آتی ہے۔ پھر وہ خاتون، جو دولہا کی بڑی بہن یا پھوپھی ہوتی ہے، دونوں ہاتھوں سے تاوا اٹھاتی ہے اور روایتی رقص پیش کرتی ہے۔ تماشائی رشتہ دار خوشی و مسرت سے تاوے پر اور بہنوئی یا پھوپھا کی ٹوپی پر نذرانے کے طور پر پیسے لگاتے ہیں۔
وہ تین چکر لگا کر تاوا واپس چانگول پر رکھتی ہے، بہنوئی یا پھوپھا پھر دومن ڈالتا ہے۔ یوں یہ عمل تین مرتبہ دہرایا جاتا ہے۔ اس کے بعد تاوا اور چانگول وہیں رکھ دیا جاتا ہے، اور گرد و پیش کے لوگ آ کر اسے اٹھا کر باہر لے جاتے ہیں۔ پھر بہنوئی یا پھوپھا آگے اور خاتون اس کے پیچھے روایتی رقص کا آغاز کرتی ہے، اور اس دوران تمام اہل خانہ، قریبی رشتدار ، مرد و خواتین مل کر تاو کی دھن پر روایتی رقص پیش کرتے ہیں۔ محفل میں ایک خاص جذبہ، سرور اور کیف آ جاتا ہے۔
اس رسم کا مفہوم نہایت گہرا ہے۔ شادی دراصل ایک نئے خاندان کی بنیاد ہے۔ تاوا اور چولہا نئے گھر بسانے کی علامت ہیں۔ یعنی ایک نئے گھر اور نئے خاندان کی بنیاد کے آغاز کی علامتی نشانی کے طور پر یہ رسم ادا کی جاتی ہے اور مسرت کا اظہار کیا جاتا ہے۔
اس رسم میں خاندان کی عظمت، وقار، گھر کی اہمیت اتحاد، محبت، برابری اور خلوص کا اظہار ہوتا ہے۔ جب خاندان کے تمام افراد ایک ہی دھن پر، ایک ساتھ روایتی رقص پیش کرتے ہیں تو یہ ثابت ہوتا ہے کہ خاندان ایک اکائی ہے اور سب ایک دوسرے کے ساتھ خلوص اور محبت سے پیوستہ ہیں۔ یہی اس رسم کی اصل روح ہے۔
یہ پونیال کی نہایت صدیوں پرانی رسم ہے۔ اس میں صرف موسیقی نہیں، بلکہ بزرگوں کی دعائیں، بہنوں کی محبت، خاندان کا اتحاد اور ثقافت سے جڑے رہنے کا پیغام پنہاں ہے۔ جب بہن اپنے بھائی کی شادی پر تاو اٹھا کر روایتی رقص پیش کرتی ہے تو وہ بہن اور بھائی کے لازوال رشتے کی تجدید کرتی ہے اور ساتھ ساتھ اپنے بھائی کے نئے گھر کے لیے خوشحالی، رزق اور محبت کی دعا کر رہی ہوتی ہے۔
یہ رسم آج بھی ادا کی جاتی ہے، لیکن اس رسم کی اہمیت کو سمجھنا لازم ہے۔ اگر ہم اسے محض ایک رسم سمجھ کر ادا کریں گے تو اس کی روح ماند پڑ جائے گی۔ ہمیں نئی نسل کو یہ بتانا ہو گا کہ تاوو صرف ایک توا نہیں، یہ گھر ہے، یہ خاندان ہے، یہ ایک اکائی ہے جس کی بنیاد باہمی احترام اور اتحاد ہے۔
افسوس کا مقام ہے کہ جدید دور میں ہماری کئی خوبصورت روایات آہستہ آہستہ زوال پذیر ہو رہی ہیں۔ ڈیجیٹل موسیقی، سوشل میڈیا اور شہری طرز زندگی نے ہماری اصل ثقافت کو پس منظر میں دھکیل دیا ہے۔ اس لیے ان رسوم کو محفوظ کرنے کی اشد ضرورت ہے تاکہ اس خوبصورت ثقافت کو ترویج دی جا سکے۔
پونیال کی ثقافت صرف ایک وادی کی ثقافت نہیں، یہ گلگت بلتستان کی شناخت ہے۔ رسمِ تاو جیسی رسوم کو زندہ رکھنا، انہیں تحریر میں لانا، انہیں فلمبند کرنا اور نئی نسل کو ان کا مفہوم سمجھانا ہم سب کی ذمہ داری ہے۔





