آغا خان ایجوکیشن سروس اور شمالی پاکستان
چٹورکھنڈ کی وہ صبح اپنی تمام تر حشر سامانیوں کے ساتھ طلوع ہوئی تھی۔ بلند و بالا پہاڑوں کی اوٹ سے جھانکتی سنہری کرنیں آہستہ آہستہ آغا خان ہائیر سیکنڈری اسکول چٹورکھنڈ کے وسیع صحن، رنگین کینوپیوں اور سبزہ زاروں پر اتر رہی تھیں۔ ہوا میں خزاں کے دنوں کی لطافت بھی تھی اور نوجوان خوابوں کی حرارت بھی۔ شمالی پاکستان کے دور دراز علاقوں، وادیوں اور پہاڑی بستیوں سے آئے ہوئے ہونہار طلبہ و طالبات اپنی آنکھوں میں مستقبل کے روشن خواب سجائے، علم و ہنر کے اس عظیم میلے میں شریک تھے۔ یوں محسوس ہوتا تھا کہ چٹورکھنڈ کے دامن میں صرف ایک تعلیمی تقریب نہیں سج رہی بلکہ آنے والے کل کی قیادت، فکر اور دانش اپنے آپ کو منوانے کے لیے یکجا ہو گئی ہے۔
آغا خان اسکولز گلگت بلتستان کے زیر اہتمام صوبائی سطح کے حُسنِ قرأت، اردو و انگریزی تقریری مقابلوں، مضمون نویسی اور ڈیبیٹ کے مقابلے دراصل اس فکری روایت کا تسلسل تھے جس کی بنیاد ایک صدی سے بھی پہلے رکھی گئی تھی۔ سکول کے احاطے میں جہاں قرآنِ حکیم کی دلنشین تلاوت کی صدائیں گونج رہی تھیں، وہیں اردو و انگریزی زبان میں اظہارِ خیال کی بہترین مثالیں بھی سامنے آ رہی تھیں۔ اس منظر کو دیکھ کر انسان کو یقین ہو جاتا ہے کہ قوموں کا مستقبل ایوانوں میں نہیں بلکہ درسگاہوں میں تشکیل پاتا ہے۔
پہلے روز ججز نے مقابلوں میں شریک طلبہ و طالبات کی صلاحیتوں کا جائزہ لیا۔ مجھے اردو تقاریر اور مضمون نویسی کے مقابلوں کے ججز کے پینل کا حصہ بننے کا موقع ملا۔ سچ پوچھیے تو فیصلہ کرنا آسان نہیں تھا۔ ہر مقرر اپنے لہجے، مطالعے اور استدلال سے متاثر کر رہا تھا جبکہ ہر مضمون نگار اپنے خیالات کی پختگی اور زبان کی شستگی سے داد وصول کر رہا تھا۔ ان بچوں نے اپنی قابلیت کا ایسا لوہا منوایا کہ کئی مواقع پر نمبروں کا فرق محض باریک ترین پہلوؤں کی بنیاد پر کرنا پڑا۔
انہی لمحوں میں مجھے اختر امام رضویؔ کا وہ شعر یاد آیا جو انہوں نے شمالی علاقہ جات کے ان پہاڑی سلسلوں کو دیکھ کر کہا تھا؎
یہ وادی یوں تو خوش منظر بہت ہے
نصیبوں میں مگر پتھر بہت ہے
مگر اس کے جواب میں پروفیسر کمال الہامی نے جو حقیقت بیان کی، وہ آج اس تقریب میں اپنے پورے مفہوم کے ساتھ سامنے موجود تھی؎
پہاڑی سلسلے چاروں طرف ہیں، بیچ میں ہم ہیں
مثالِ گوہرِ نایاب ہم پتھر میں رہتے ہیں
واقعی ہم آج انہی پتھروں کی سرزمین کے گوہرِ نایاب سے روبرو تھے۔ ایسے گوہر جو اگر مناسب مواقع، معیاری تعلیم اور درست رہنمائی حاصل کریں تو دنیا کے کسی بھی پلیٹ فارم پر اپنی شناخت بنا سکتے ہیں۔
ان طلبہ و طالبات کو دیکھتے ہوئے بار بار سر سلطان محمد شاہ آغا خان سوّم کا وژن یاد آتا رہا۔ وہ شخصیت جو نہ صرف آل انڈیا مسلم لیگ کے پہلے صدر تھے بلکہ برصغیر کے مسلمانوں کی سیاسی، سماجی اور تعلیمی بیداری کے عظیم معماروں میں شمار ہوتے ہیں۔ سر سید احمد خان، قائداعظم محمد علی جناح اور علامہ محمد اقبال جیسے اکابرین کے دست و بازو کے طور پر انہوں نے مسلم معاشروں میں تعلیم کو بنیادی ترجیح قرار دیا۔
سنہ 1946ء میں اپنی ڈائمنڈ جوبلی کے موقع پر ملنے والے نذرانوں کو ذاتی آسائش پر خرچ کرنے کے بجائے علم کے چراغ روشن کرنے کے لیے وقف کرنا ان کے غیر معمولی وژن کا ثبوت ہے۔ ان کا یہ تاریخی قول آج بھی تعلیمی فلسفے کی صورت زندہ ہے کہ اگر کسی خاندان کے پاس صرف ایک بچے کو تعلیم دینے کی استطاعت ہو اور ایک بیٹا اور ایک بیٹی ہو تو بیٹی کو تعلیم دی جائے، کیونکہ ایک تعلیم یافتہ عورت صرف اپنی زندگی نہیں سنوارتی بلکہ نسلوں کی تقدیر بدل دیتی ہے۔
اسی فکر نے آگے چل کر آغا خان چہارم ہز ہائی نس شاہ کریم الحسینی کی قیادت میں آغا خان ایجوکیشن سروسز کی شکل اختیار کی اورہز ہائی نس شاہ رحیم الحسینی آغا خان پنجم کی قیادت میں اس ادارے کی خدمات کا سلسلہ جاری ہے، جس کا علامتی نشان کھلی کتاب پر مشتمل ہے، جس میں قرآن کریم کے پہلے حکم ’’اقرأ‘‘ کی دوہری جھلک نمایاں کی گئی ہے۔ گویا اس ادارے کی بنیاد ہی علم، تحقیق اور شعور کے آفاقی پیغام پر رکھی گئی ہے۔
آغا خان ایجوکیشن سروسز کا آغاز بیسویں صدی کے ابتدائی برسوں میں ہوا۔ 1905ء میں قائم ہونے والے ابتدائی تعلیمی مراکز اپنے دور کے اعتبار سے غیرمعمولی طور پر ترقی پسند تھے۔ جب دنیا کے بہت سے خطوں میں بچیوں کی تعلیم کو اہمیت نہیں دی جاتی تھی، تب یہ ادارہ لڑکوں اور لڑکیوں دونوں کے لیے یکساں تعلیمی مواقع فراہم کرنے پر زور دے رہا تھا۔ یہی وجہ ہے کہ آج آغا خان ایجوکیشن سروسز ترقی پذیر دنیا کے سب سے بڑے نجی، غیر منافع بخش اور غیر فرقہ وارانہ تعلیمی نیٹ ورکس میں شمار ہوتی ہے۔
افغانستان، بنگلہ دیش، بھارت، کینیا، کرغزستان، پاکستان، تاجکستان، تنزانیہ، یوگنڈا اور متحدہ عرب امارات سمیت متعدد ممالک میں دو سو سے زائد تعلیمی ادارے اس وژن کو عملی شکل دے رہے ہیں۔ اگر ہم صرف شمالی پاکستان خصوصاً گلگت بلتستان اور چترال کی بات کریں تو سو سے زائد اسکول ان وادیوں علم کی شمع روشن کرنے میں مصروف ہیں۔ یہی وجہ ہے کہ آغا خان اسکولز سے فارغ التحصیل ہونے والے طلبہ صرف اچھے ڈاکٹر، انجینئر، اساتذہ یا منتظمین ہی نہیں بنتے بلکہ اپنی برادریوں میں مثبت تبدیلی کے علمبردار بھی ثابت ہوتے ہیں۔ تعلیم کو خدمت سے جوڑ دینا دراصل اس پورے نظام کی سب سے بڑی خصوصیت ہے۔
جناب بلبل خان ڈپٹی جنرل مینیجر آغا خان ایجوکیشن سروس گلگت بلتستان تقریب کے پہلے روز اپنی ابتدائیہ کلمات میں یہی چیزیں سامعین کی سماعت کی نذر کر رہے تھے۔
تقریب کے دوسرے روز انعامات اور شیلڈز کی تقسیم کے ساتھ ساتھ ایسی گفتگو بھی سننے کو ملی جو ذہنوں پر دیرپا اثر چھوڑ گئی۔ جنرل مینیجر آغا خان ایجوکیشن سروس گلگت بلتستان بریگیڈیئر (ر) خوش محمد نے شرکاء کو خوش آمدید کہتے ہوئے ادارے کے مشن اور مقاصد پر مدلل روشنی ڈالی۔ ان کے الفاظ میں تعلیمی خدمت کا جذبہ اور مستقبل کی امید یکجا نظر آتی تھی۔
بعد ازاں آغا خان ایجوکیشن سروسز پاکستان کے کنٹری ہیڈ آئین شاہ نے کلیدی خطاب کیا۔ سچ تو یہ ہے کہ ان کی تقریر پر الگ سے ایک پورا کالم بن سکتا ہے۔ اس پر پھر کبھی لکھتے ہیں۔ یاسین کے ایک پرائمری اسکول میں تدریسی خدمات سے اپنے سفر کا آغاز کرنے والے آئین شاہ صاحب آج ادارے کی قومی قیادت سنبھالے ہوئے ہے۔ ان کی گفتگو میں مطالعے کی وسعت، فکر کی گہرائی اور تجربے کی پختگی نمایاں تھی۔ ایسے افراد کسی ادارے کے لیے صرف منتظم نہیں بلکہ امید کی علامت ہوتے ہیں۔
صدر اسماعیلی کونسل برائے اشکومن پونیال پروفیسر داد خان صابر نے بھی اپنے خیالات کا اظہار کیا جبکہ اختتامی مرحلے میں وزیرِ منصوبہ بندی، ترقی و اطلاعات گلگت بلتستان سید جلال علی شاہ نے مختصر مگر انتہائی مؤثر خطاب کیا۔ ایک نوجوان رہنما میں فصاحت، اعتماد اور وژن کی موجودگی نہایت اہم ہوتی ہے اور سید جلال علی شاہ کی گفتگو میں یہ تمام عناصر نمایاں تھے۔
تقریب کے اختتام پر جب کامیاب طلبہ و طالبات اپنے اعزازات وصول کر رہے تھے تو یوں محسوس ہوتا تھا جیسے انعامات صرف افراد میں تقسیم نہیں ہو رہے بلکہ ایک روشن مستقبل کی ضمانتیں بانٹی جا رہی ہیں۔ ان معصوم چہروں پر مسکراہٹیں تھیں، والدین کی آنکھوں میں فخر تھا اور اساتذہ کے چہروں پر اطمینان۔
تاریخ کے افق پر نگاہ ڈالیں تو علم کی یہ روشنی کسی ایک عہد یا ایک ادارے کی مرہونِ منت نہیں بلکہ چودہ صدیوں پر پھیلی ہوئی اُس روایت کا تسلسل ہے جس کی بنیاد بابِ مدینۃ العلم، مولائے کائنات حضرت علی ابن ابی طالبؑ نے رکھی۔ آپؑ نے جب فرمایا کہ ’’دولت کی حفاظت کرنی پڑتی ہے جبکہ علم انسان کی حفاظت کرتا ہے‘‘، تو گویا آنے والی نسلوں کے لیے فکری رہنمائی کا ایک ابدی منشور عطا کر دیا۔ پھر ائمۂ اہلِ بیتؑ نے زمانے کے جبر، سیاسی آشوب اور فکری تاریکیوں کے باوجود علم و حکمت کے چراغ روشن رکھے۔ امام محمد باقرؑ اور امام جعفر صادقؑ کی دانش گاہوں سے اٹھنے والی روشنی نے نہ صرف اسلامی علوم بلکہ فلسفے، ریاضیات، طب اور سائنس کے افق بھی منور کیے۔ بعدازاں فاطمی دور آیا تو علم ایک ریاستی ترجیح بن گیا۔ قاہرہ کے افق پر الازہر کی بنیاد رکھی گئی، دارالحکمۃ جیسے علمی مراکز وجود میں آئے، کتب خانے آباد ہوئے اور قلم کی حرمت کو تاج و تخت کی عظمت پر فوقیت دی گئی۔ وہ دراصل ایسی تہذیب تھی جو تلوار کی دھار سے زیادہ عقل کی روشنی پر یقین رکھتی تھی۔ آج جب ہم عصرِ حاضر میں درِ امامت کے زیرِ سایہ قائم تعلیمی اداروں، جامعات، اسکولوں اور علمی تحریکوں کو دیکھتے ہیں تو محسوس ہوتا ہے کہ یہ سب اسی کاروانِ علم کے مسافر ہیں جو نجف و مدینہ کی درسگاہوں سے چل کر قاہرہ کے علمی ایوانوں سے گزرا اور وقت کی صدیوں کو عبور کرتا ہوا آغا خان خاندان کی قیادت میں آج بھی انسانیت کے مستقبل کو علم، شعور اور امید کی روشنی عطا کر رہا ہے۔ چٹورکھنڈ میں جمع یہ درخشاں چہرے، یہ پُرامید آنکھیں اور یہ خوابوں سے معمور نوجوان دراصل اسی چودہ سو سالہ روایتِ دانش کے تازہ پھول ہیں، جن کی خوشبو آنے والے زمانوں تک پھیلتی رہے گی۔




