تازہ ترین اپ ڈیٹس October 6th, 2021 2:23 PM
کرونا پر قابوپانے کے لئےاحتیاط نہ کی گئی تو دوبارہ لاک ڈاؤن کی طرف جانا پڑے گا، ڈپٹی کمشنرہنزہ
ہنزہ (بہرام خان ) مسلسل بڑھتی ہوئی کرونا وائرس کیسیز کی صورتحال کے پیش نظراتوار کے دن ہنزہ بھر میں مکمل لاک ڈاون رہا۔
ہنزہ بھر میں جرنل سٹورز سمیت تمام مارکٹیں اور ٹرانسپورٹ بند رکھا گیا ۔ داخلی اور خارجی راستوں کو مکمل سیل کردیا گیا۔ این او سی کے بغیر چلنے والی گاڑیوں کو بھی روکا گیا۔
ڈپٹی کمشنر فیاض احمد نےصحافیوں سے ملاقات میں کہا کہ ہنزہ میں کرونا وائرس کیسیز میں اچانک تشویش ناک حد تک اضافہ ہوا ہے۔ انتظامیہ اس وقت متحرک ہے اوردن رات کام کر رہے ہیں ۔ عوام بھی انتظامیہ کی طرف سے طے شدہ ایس او پیز پر عمل درآمد کریں۔ ہنزہ کے تمام عمائدین، بازار ایسوسیشن، ریجنل کونسل اور امامیہ کونسل کے ذمہ داران سے اپیل کیا گیا ہے کہ موجودہ صورتحال کے پیش نظر پہلے کی طرح اپنا کردار ادا کریں ۔ تاکہ اس وبا کو کم یا ختم کرنے میں ہم کامیاب ہوسکے۔
ڈپٹی کمشنر نے مزید کہا کہ کمیونٹی لیول پر مختلف محلوں میں کمیٹیاں بنانے کی بھی سفارش کی ہے تاکہ انتظامیہ کی طرف سے طے شدہ ایس او پیز پر عمل درآمد کو یقینی بنائے۔ اگر عوام ایس او پیزکو نظر انداز کرکے اسی طرح کےصورتحال برقرار رہی تو ہم مکمل طور پر لاک ڈاون کی طرف جائنیگے ۔ اس لیے عوام سے درخواست ہے کہ ماسک اور سماجی دوری کا خاص خیال رکھے ۔
آج ڈپٹی کمشنر فیاض احمد کی ہدایت پر سٹی مجسٹریٹ فرمان کریم کی قیادت میں علی آباد بازار میں لاک ڈاون پر عمل درآمد کرانے کے لیے پولیس عملے کے ساتھ دن بھر گشت کرتے رہے ۔ بغیر ماسک کے چلنے والے افراد اور ڈرائیور حضرات کو بھی جرمانے کئے گئے۔
