آغاخان ایجوکیشن سروس کا تعلیمی میدان میں کردارمثالی ہے، ڈی پی او چترال

چترال (نذیرحسین شاہ نذیر)آغا خان ہائیرسیکنڈری سکول سین لشٹ میں سہ روزہ سائنس اینڈآرٹ نمائش شروع ہوگئی، جس میں سرکاری اور غیر سرکاری سیکٹر کے سکولوں اور کالجو ں کے طلباء وطالبات سائنس کے مختلف مضامین فزکس، کیمسٹری، بیالوجی ، کمپیوٹر سائنس ، ریاضی اور آرٹ میں سینکڑوں پراجیکٹس پیش کررہے ہیں۔

ڈسٹرکٹ پولیس افیسر کیپٹن (ریٹائرڈ) محمد فرقان بلال نے فیتہ کاٹ کرنمائش کا افتتاح کیا۔

انہوں نے اپنے خطاب میں کہاکہ چترال کے اسٹوڈنٹس میں ٹیلنٹ کی کوئی کمی نہیں ہے اور آغاخان ہائر سیکنڈری اسکول میں کوالٹی ایجوکیشن کی خصوصی تعریف کی جس کے قیام کے پانچ سالوں کے اندر درجنوں طلباء پاک آرمی میں کمیشن لے چکے ہیں۔ جبکہ اتنی ہی تعداد میں طلبا وطالبات میڈیکل اور انجینئرنگ کالجوں میں داخلہ لے چکے ہیں۔ مختلف سکولوں اور کالجوں کے طالب علم، اساتذہ کے علاوہ سول سوسائٹی سے بھی بڑی تعداد میں لوگوں نے نمائش کا وزٹ کیا اور سائنس پراجیکٹس میں دلچسپی کا مظاہر ہ کیا۔

صدرمحفلصدر اسماعیلی کونسل فارلوئر چترال محمدافضل، سکول کے پرنسپل طفیل نوازاوردیگرمقررین نے خطاب کرتے ہوئے کہاکہ ہزہائی نس پرنس کریم آغاخان نے فروع علم کے حوالے سے جووژن دیاہے ، اُس کی بدولت چترال جیسے علاقے میں بچوں میں بھی حصول علم کے ذریعے کامیاب راہیں تلاش کرنے کے بارے میں سوچ کوتقویت ملی ہے اور یہی وجہ ہے کہ گذشتہ تین دہائیوں سے تعلیمی میدان میں چترال میں بہت بڑی تبدیلی آئی ہے ،جس میں آغاخان ایجوکیشن سروس کاکردارمثالی ہے۔انہوں نے کہاکہ پاکستان کے بڑے بڑے تعلیمی اداروں کے مقابلے میں آغاخان اسکول میں انتہائی کم خرچ پر کوالٹی ایجوکیشن ہمارے بچوں کوملتی ہے اور آج کی یہ نمائش طلباء وطالبات کی بے پناہ صلاحیتوں کی عکاسی ہے۔

Print Friendly, PDF & Email

آپ کی رائے

comments