شہباز شریف نے گلگت بلتستان میں پیپلز پارٹی کی حکومت سازی کی حمایت کا اعلان کر دیا، گورنر اور ڈپٹی اسپیکر مسلم لیگ (ن) کو دینے پر اتفاق
گلگت (نامہ نگار) وزیراعظم شہباز شریف نے کہا ہے کہ گلگت بلتستان میں پاکستان پیپلز پارٹی اکثریتی جماعت کے طور پر سامنے آئی ہے، اس لیے اسے حکومت بنانے کی دعوت دی جاتی ہے۔
اپنے بیان میں وزیراعظم نے کہا کہ پاکستان مسلم لیگ (ن) گلگت بلتستان میں حکومت سازی کے معاملے پر پیپلز پارٹی کی حمایت کرے گی۔ انہوں نے بتایا کہ مسلم لیگ (ن) نے گلگت بلتستان اسمبلی میں اپوزیشن میں بیٹھنے کا فیصلہ کیا ہے۔
شہباز شریف کے مطابق، مسلم لیگ (ن) کے منتخب اراکین حکومت سازی کے لیے پاکستان پیپلز پارٹی کو ووٹ دیں گے۔ انہوں نے کہا کہ یہ فیصلہ جمہوری روایات اور اقدار کو مقدم رکھتے ہوئے کیا گیا ہے۔
دوسری جانب بلاول بھٹو زرداری نے وزیراعظم کے بیان کا خیرمقدم کرتے ہوئے کہا کہ اتفاقِ رائے کے مطابق گلگت بلتستان میں آئندہ گورنر اور ڈپٹی اسپیکر کا منصب مسلم لیگ (ن) کے حصے میں آئے گا۔
