آپریشن “غضب للحق” دہشت گرد عناصر کے خلاف ہے، کسی ملک کے نہیں: وزیر اعلیٰ

گلگت: جسٹس (ر) یار محمد نے آپریشن “غضب للحق” کی بھرپور حمایت کا اعلان کرتے ہوئے کہا ہے کہ قومی سلامتی اور سرحدوں کا تحفظ ریاست کی اولین ذمہ داری ہے۔

اپنے بیان میں نگراں وزیر اعلیٰ نے کہا کہ افغانستان کی سرزمین سے دراندازی پاکستان کی سلامتی پر براہِ راست حملہ تصور کی جائے گی۔ ان کا کہنا تھا کہ شہریوں کے جان و مال کے تحفظ کے لیے ریاست کو ہر آئینی اقدام اٹھانے کا حق حاصل ہے۔

جسٹس (ر) یار محمد نے واضح کیا کہ پاکستان امن کا خواہاں ہے، تاہم اپنے دفاع کا حق محفوظ رکھتا ہے۔ انہوں نے زور دے کر کہا کہ آپریشن “غضب للحق” کسی ملک کے خلاف نہیں بلکہ دہشت گرد عناصر کے خلاف کارروائی ہے۔

نگراں وزیر اعلیٰ نے کہا کہ پاک فوج اور دیگر سیکیورٹی ادارے قومی وقار کے تحفظ کے لیے ہمہ وقت تیار ہیں، اور پوری قوم اپنی مسلح افواج کے ساتھ کھڑی ہے۔

انہوں نے اپنے پیغام میں دوٹوک الفاظ میں کہا کہ سرحدی خلاف ورزی کسی صورت برداشت نہیں کی جائے گی۔